L-ESCO għandha l-għan li ttejjeb il-mobbiltà fl-Ewropa kollha billi tipprovdi terminoloġija standard dwar l-impjiegi u l-ħiliet li jintużaw f’pajjiżi differenti, filwaqt li tiżgura t-trasparenza u l-komparabbiltà tal-ħiliet u tal-impjiegi fl-Ewropa. L-ESCO tiffaċilita suq tax-xogħol Ewropew diġitali u interkonness billi tappoġġa tliet każijiet ewlenin ta’ użu wiesa’: it-tqabbil u t-tiftix tal-impjiegi, il-gwida għall-karriera u l-ġestjoni tat-tagħlim, u l-analiżi tar-riċerka u tal-big data tas-suq tax-xogħol. F’dawn il-każijiet kollha tal-użu, l-ESCO sservi bħala pedament versatili għall-iżviluppaturi, li tippermetti l-ħolqien ta’ applikazzjonijiet u ta’ għodod diversi li joffru servizzi bħal sistemi ta’ mili awtomatiku u ta’ suġġerimenti, algoritmi għat-tiftix tal-impjiegi u għat-tqabbil tal-impjiegi, pjattaformi għall-progressjoni tal-karriera, sistemi għall-ġestjoni tat-tagħlim (LMS), pjattaformi għall-assessjar tal-ħiliet, apps tal-mobbiltà fl-impjiegi, u aktar.

Sabiex l-ESCO ssir aċċessibbli għal firxa wiesgħa ta’ utenti u tippermetti integrazzjoni bla xkiel f’diversi servizzi, l-ESCO tiġi ppubblikata bħala Data Miftuħa u Konnessa. Dan ifisser li d-data tkun disponibbli b’mod miftuħ u interkonnessa, biex trawwem il-kollaborazzjoni u l-interoperabbiltà. Il-klassifikazzjoni tal-ESCO tista’ tiġi aċċessata permezz ta’ żewġ metodi primarji: